గంజాయి మత్తు… యువత చిత్తు

గంజాయి మత్తు… యువత చిత్తు
◆గంజాయికి అలవాటు పడుతున్న యువకులు
◆నిర్మానుష్య ప్రదేశాల్లో ప్రశాంతంగా గం’జాయ్’
◆ పాన్ షాప్ లు, బెల్టుషాపులే అడ్డాలు
◆మానసికంగా నరకం అనుభవిస్తున్న తల్లిదండ్రులు
◆అమాయకులను వ్యాపారంలోకి దించుతున్న స్మగ్లర్లు
జగిత్యాల ఫిబ్రవరి 02 (ప్రజాకలం జిల్లా ప్రతినిధి) : యువత భవితవ్యం వ్యసనాలకు బానిస అవుతుంది. ఇది మత్తు కోసం ఆరాట పడుతున్న యువత పలురకాల డ్రగ్స్ ను ఆశ్రయిస్తుంది. కిక్కు కోసం పలురకాల పదార్థాల వైపు మొగ్గుచూపుతున్నారు. రేటు ఎక్కువ అయినా పర్వాలేదు కానీ మత్తు ఎక్కువ కావాలంటూ తాపత్రయపడుతున్నారు. అందులో భాగంగా గం’జాయ్’ కి అలవాటు పడుతున్నారు. గంజాయిని సిగరెట్ల లో ఎక్కించి ఎంజాయ్ చేస్తున్నారు. జిల్లా లోని ప్రతి పట్టణంతో పాటు చుట్టుపక్కల మండలాల్లో గంజాయి విక్రయాలు వాడకం జోరుగా సాగుతున్నాయి. మత్తు కోసం వ్యసనాల బారిన పడుతున్న యువతను ఆసరాగా చేసుకున్న కొందరు వ్యక్తులు గంజాయిని సరఫరా చేసి కాసులు సంపాదించుకుంటున్నారు. యువతకు అలవాటు చేసి తప్పుదోవ పట్టిస్తున్నారు. ఇంటర్, డిగ్రీ విద్యార్థులతో పాటు కొందరు పేరొందిన వ్యక్తుల పిల్లలు కూడా ఈ వ్యసనాల కు అలవాటు పడి తమ భవితను గంజాయ్ కి బానిస చేస్తున్నారు.
ఇటీవల మెట్ పల్లి డివిజన్ లోని ఒక గ్రామంలో గంజాయి మత్తులో ఒక యువతి పై ఒక మైనర్ బాలుడు చేసిన అఘాయిత్య0 తీవ్ర సంచలనం రేపిన నేపథ్యంలో డివిజన్ లో గంజాయి మత్తులో జోగుతున్న యువత గురించి కూడా జోరుగా చర్చ జరుగుతోంది.
విస్తరిస్తున్న విష సంస్కృతి
కొందరు స్మగ్లర్లు గంజాయిని యువతకు అందజేసేందుకు పాన్ షాప్ లు, బెల్ట్ షాపులు, కిరాణా షాపులు అడ్డాలుగా ఎంచుకుంటున్నారు. జిల్లా లోని పట్టణాల్లో మరియు మండలాల్లోని ప్రధాన కూడళ్ళలో ని పాన్ షాప్ లో కిరాణా షాపులు గంజాయ్ విక్రయాలకు అడ్డాలుగా మార్చుకుంటూ ఉన్నట్లు సమాచారం. ఆయా అడ్డాలతో ముందుగానే సిగరెట్ల లో ఉన్న పొగాకు వాటిని బయటకు తీసి అందులో గంజాయి ఆకును జొప్పించి, సిగరెట్ల వారిగా రేట్లు నిర్ణయిస్తారు. తమకు తెలిసిన యువతకు మాత్రమే ఆ సిగరెట్లను విక్రయిస్తారు. కాగా కొన్ని ప్రాంతాల్లో విద్యార్థులను, ఈజీ మనీకి అలవాటు పడి మరికొందరు యువతను ఈ వ్యాపారంలోకి దింపుతున్నారు. కళాశాలలో కి, స్కూల్లో కి కూడా ఈ విష సంస్కృతి విస్తరించడంతో ఒక విద్యార్థిని చూసి మరొకరు గంజాయి కి అలవాటు పడిపోతున్నారు. అంతేకాదు అలా అలవాటు చేసేలా విద్యార్థులను వ్యాపారులు ప్రోత్సహిస్తున్నారు. అలా దానికి బానిసైన విద్యార్థులు తమ వద్ద నగదు లేకుంటే సంబంధిత గంజాయి వ్యాపారుల బైండోవర్ అయిపోతున్నారు. వారి వ్యాపారంలో భాగస్వాములు గా చేరుతున్నారు. యువత వ్యసనాన్ని ఆసరాగా చేసుకుంటున్న స్మగ్లర్లు మరికొంత డబ్బు ఆశ చూపి వారిని రవాణాకు వినియోగిస్తున్నట్లు సమాచారం. కాగా గతంలో జిల్లా లో పట్టుబడిన సంఘటనల్లో పలువురు విద్యార్థులు ఉండటమే దానికి నిదర్శనంగా నిలుస్తున్నాయి.
శివారు ప్రాంతాలు అడ్డాగా
గంజాయి మత్తుకు అలవాటయిన యువత పట్టణ శివారు ప్రదేశాల్లో ఏకాంతంగా దమ్ము కొట్టేందుకు సిద్ధపడుతున్నారు. ఉదయాన్నే కళాశాలలకు అని చెప్పి బయల్దేరిన విద్యార్థులు కొందరు శివారు ప్రాంతాల్లో తమ స్నేహితులతో కలిసి గంజాయి సేవిస్తున్నారు. మరికొందరు గంజాయ్ కి అలవాటు పడిన యువత ప్రత్యేకంగా అద్దెకు గదులను తీసుకొని అందులో ఆయా పనులు ముగించుకుంటున్నారు. మరికొందరు రోడ్లపైకి వచ్చి గొడవలకు దిగుతున్న సంఘటనలు కూడా ఉన్నాయి. పట్టణ శివార్లలో అడ్డాలుగా విద్యార్థులు కొందరు హైదరాబాద్ నుంచి హుక్కా పాట్స్ ను తీసుకువచ్చి గదుల్లో హుక్కా కొడుతున్నారు. అంతేకాదు హుక్కా ఫ్లేవర్లు గా గంజాయిని కూడా కలిపి మత్తును ఆస్వాదిస్తున్నారు.
నరకం అనుభవిస్తున్న తల్లిదండ్రులు…
గంజాయిని నిత్యం వాడటం వల్ల దానికి పూర్తిగా బానిస అవుతున్న వారు చివరకు అది లేకపోతే ఉండలేని పరిస్థితులు ఏర్పడుతుంది. బానిసలుగా మారిన వారిలో యూ పి రియా (ఉన్నది లేనట్టుగా… లేనిది ఉన్నట్టుగా, మైకంలో తేలి ఆడటం) కు గురవుతారు. దీనిని సాధారణంగా సిగరెట్లు, హుక్కా లో కలిపి మత్తును ఆస్వాదిస్తారు. దానివల్ల డిప్రెషన్లోకి వెళ్లడం,యగలైన్టికీ కి లోనుకావడం, జ్ఞాపక శక్తిని కోల్పోవడం లాంటివి జరుగుతాయి. మానసిక స్థితి సరిగ్గా లేకపోవడం, గ్రహణశక్తి కోల్పోవడం, అధిక దాహం, మలబద్ధకం, మతిభ్రమించిన వాడిలా లక్షణాలు ఉంటాయి. కాగా తమ పిల్లలు గంజాయ్ కి అలవాటు పడినట్లు ఇంట్లోని తల్లిదండ్రులు కు తెలిసిన బయటకు చెప్పుకోలేక ఆందోళన చెందుతున్నారు. కొంతమంది తల్లిదండ్రులు అలవాటుపడిన పిల్లలకు కౌన్సిలింగ్ ఇప్పించిన మళ్ళీ అదే బాటలో నడవడంతో మానసికంగా నరకం అనుభవిస్తున్నారు. అంతేనా కొందరు యువత ఇళ్లల్లో తమ తల్లిదండ్రుల పైన దాడులకు దిగే పరిస్థితి డివిజన్లో నెలకొంది. అంతే కాదు దానికి అలవాటు పడిన యువత పోలీసులను సైతం లెక్క చేయడం లేదన్న వాదన వినిపిస్తోంది. వారు అదుపులోకి తీసుకుని కౌన్సిలింగ్ ఇచ్చి వదిలేస్తారు అన్న భావనలో కొందరు యువత ఉన్నట్లు తెలుస్తుంది. కాగా ఇప్పటికైనా ఉన్నతాధికారులు స్పందించి గంజాయ్ విక్రయాలకు అడ్డుకట్ట వేయాలని, శివార్లలో నిఘా పెంచి గంజాయి దమ్ము కొడుతున్న యువకులకు కౌన్సిలింగ్ ఇవ్వాలని ప్రజలు కోరుతున్నారు.