శృతి మించుతున్న ‘ప్రీ వెడ్డింగ్ షూట్స్’
– ఆసుపత్రులు, స్మశానాలు, బురదలో, రోడ్లపై, నదులు, జలపాతాల వద్ద ఫోటో షూట్స్
– మొదట్లో పట్టణాలలో ఉన్న ఈ సంస్కృతి ఇప్పుడు పల్లెలకూ పాకింది
– ఉత్తరఖాండ్ లో నదిలో ఫోటో షూట్స్ చేస్తూ ఓ జంట నీటి ప్రవాహానికి గల్లంతు
– పెళ్ళికి ముందే ‘కట్టు తప్పుతున్న’ నూతన వధూవరులు
– ఇది మంచి సాంప్రదాయం కాదంటున్న ఆధ్యాత్మికవేత్తలు…
– ఆడపిల్ల తల్లిదండ్రులకు తడిసి మోపెడవుతున్న ఖర్చు
హైదరాబాద్ ఎల్లారెడ్డి మార్చ్ 03 ప్రజా కలం ప్రతినిధి : పెళ్లి ఖర్చు ఓ వైపు ఆకాశాన్ని అంటితే కల్యాణం పేరుతో కొన్ని పెడపోకడలు కూడా ప్రవేశిస్తున్నాయి. ముఖ్యంగా ప్రీ వెడ్డింగ్ షూట్, ఫోటో షూట్‌ల పేరుతో జరుగుతున్న హంగామా కొన్ని సార్లు హద్దులు దాటుతోంది. అన్ని మతాల్లోనూ అత్యంత పవిత్రమైన ఘట్టమైన పెళ్లి తంతు అసహ్యంగా కూడా మారుతోంది. కొందరు ఆసుపత్రులు, శ్మశానాలు, బురదలో షూట్ చేయించు కుంటున్నారు. నదులు, సముద్రాలు, కొండలు వంటి ప్రదేశాల్లో షూట్ చేయించుకుంటూ కొందరు ప్రాణాలు కోల్పోయిన ఉదంతాలూ ఉన్నాయి.
రకరకాల లొకేషన్లలో ఫోటో, వీడియో షూట్ :
పెళ్లంటే జీవితంలో ఒక్కసారి మాత్రమే జరిగే కార్యక్రమం. ఈ జ్ఞాపకాన్ని కలకాలం దాచుకోవాలని ఒకప్పుడు ఫోటోలు, వీడియోలు తీయించుకునే వారు. అయితే ఇప్పుడు ఆ పరిధి దాటి ఫోటో షూట్, ప్రీవెడ్డింగ్‌లు వచ్చేశాయి. పెళ్లి చేసుకోబోయే జంట కొన్ని రోజుల ముందే ఏదైనా అందమైన ప్రదేశానికి వెళ్లి ఫోటో షూట్ జరిపించుకుంటున్నారు. ఆ వీడియోను పెళ్లి రోజు పెద్ద వీడియో తెరలపై ప్రదర్శిస్తున్నారు. మొదట్లో పట్టణాలలో ఉన్న ఈ సంస్కృతి ఇప్పుడు పల్లెలకూ పాకింది. ఇటీవలి కాలం వరకు పెళ్లి రోజు ఫ్లెక్సీ పెట్టించడానికి రెండు, మూడు రోజుల ముందు వధూ వరులు ఫొటో దిగేవారు. ఇదే ఆధునీకరణ చెందుతూ ప్రీవెడ్డింగ్ షూట్‌గా మారింది. ఫొటోలకే పరిమితం కాకుండా సినిమా పాటలకు డాన్స్ చేస్తూ రకరకాల లొకేషన్లలో వీడియో షూట్ చేయించుకుంటున్నారు.
ఇతరుల కంటే భిన్నంగా ఉండాలనే తాపత్రయం…
ప్రీ వెడ్డింగ్ షూట్‌ల ద్వారా పెళ్లిని ఎప్పటికీ గుర్తుండిపోయేలా చేసుకోవాలని భావించడంలో తప్పు లేకున్నా ఇటీవల కాలంలో అది కట్టుతప్పడమే ఆందోళన కల్గిస్తోంది. ఇవి ఒక్కోసారి శృతి మించుతున్నాయి. ఇతరుల కంటే భిన్నంగా ఉండాలనే తాప త్రయంతో కొందరు ఆసుపత్రులు, శ్మశానాలు, బురదలో సైతం షూట్ చేయించుకుంటున్నారు. శ్మశానం అంటే కీడుగా భావిస్తుంటారు. అయితే పవిత్రమైన పెళ్లికి సంబంధించిన ఘట్టాన్ని అక్కడ జరిపించుకుంటూ దీన్ని అపవిత్రంగా మారుస్తున్నారు. హైదరాబాద్‌లో ఓ పోలీసు తన భార్యతో కలిసి స్టేషన్‌లో పోలీస్ వాహనం ముందు ఈ తరహా షూట్ చేయడం సంచలనమైంది. ఇద్దరూ పోలీసులే కావడం, శుభ కార్యం కావడంతో అధికారులు పెద్దగా పట్టించుకోలేదు. ప్రమాదకర ప్రదేశాల్లో ఫోటో షూట్ జరిపించుకుంటూ ప్రాణాలు కోల్పోయిన వారూ ఉన్నారు. ఉత్తరాఖండ్‌లో ఓ జంట నదిలో ఫొటో షూట్ చేయటానికి వెళ్లి అకస్మాత్తుగా నీటి మట్టం పెరగడంతో కొట్టుకుపోయారు.
వేలం వెర్రిగా ప్రీ వెడ్డింగ్ షూట్…
ఒకప్పుడు పెళ్లి అంటే అమ్మాయిలు సిగ్గుతో తల ఎత్తుకునే వాళ్లే కాదు అనే మాట తరచూ వింటూనే ఉంటాం. నిజంగానే పెళ్లిళ్లు ఒకప్పుడు అలాంటి పద్ధతుల్లో జరిగేవి. పెళ్లి కూతురుగా ముస్తాబైన తర్వాత అలంకరణ చెదిరిపోతుందని, లేక ఇంకా వేరు వేరు కారణాలతో పెళ్లి కూతురును పెద్దవారు ఇంటి నుంచి బయటకు రానిచ్చేవారు కాదు. కానీ ఇటీవల యువతులు పెళ్లికూతురు ముస్తాబులో ఏకంగా బుల్లెట్‌ బైక్‌ నడుపుతూ చక్కర్లు కొడుతూ ఆ వీడియోలను మీడియాలో వైరల్‌ చేస్తున్నారు. ప్రీ వెడ్డింగ్, హల్దీ, మెహందీ, పోస్టు వెడ్డింగ్, బేబీ బంప్‌ వీడియోలు షూట్ చేసుకోవడం సాధారణంగా మారిపోయింది. మితీమీరనంత వరకు ఏదైనా మంచిదే అంటున్నారు నిపుణులు. ప్రీ వెడ్డింగ్ అనేది వేలం వెర్రిగా మారుతోందంటున్నారు.
నవ దంపతుల మధ్య కెమిస్ట్రీ ఉండాలంటూ ప్రీవెడ్డింగ్…
కొందరు పెళ్లి ఆడంబరాల కోసం చేస్తున్న ఖర్చులు వృథాగా ఆధ్యాత్మిక వేత్తలు అభి వర్ణిస్తున్నారు. ఆ క్షణం చేసిన ఏర్పాట్లు, పెట్టిన ఖర్చు ఎందుకు పనిరాదని హితవు పలుకు తున్నారు. ప్రీవెడ్డింగ్ షూట్‌లు, ప్రత్యేకమైన థీమ్స్‌లో జరుగుతున్న తతంగం కొన్నిచోట్ల అసహ్యంగా సాగుతోందని, క్లోజ్‌గా మూవ్‌ కావాలంటూ ఇంకా పెళ్లికాని యువతీ యువకులపై ఒత్తిడి తీసుకురావడం అనుకోని ఇబ్బందులకు కారణమవుతోందని వారిస్తున్నారు. కెమిస్ట్రీ ఉండాలంటూ ప్రీవెడ్డింగ్ వేడుకల సందర్భంగా చేస్తోన్న సూచనలను, తల్లిదండ్రులే గట్టిగా నియంత్రించాలే తప్ప పౌరసమాజం కాదని వారు అంటున్నారు.
అప్పులు తెచ్చి మరీ అట్టహాసంగా పెళ్లిల్లు….
తెలుగు రాష్ట్రాల్లో ప్రస్తుతం పేద, మధ్య తరగతి కుటుంబాలు సైతం కట్న కానుకలు కాకుండా ఒక పెళ్లికి సగటున రూ.10 లక్షలకుపైగా అప్పులు చేసి ఖర్చు పెడుతున్నాయి. ఈ క్రమంలోనే ఖర్చులు హద్దులు దాటి, పేద మధ్య తరగతి కుటుంబాలు అప్పుల ఊబిలో కూరుకు పోతున్నాయి. అందువల్ల వీరు హంగులు, ఆర్భాటాలకు వెళ్లకుండా, అప్పుల పాలు కాకుండా పెళ్లిళ్లు చేస్తేనే మేలనే వాదన వినిపిస్తోంది. యువత కూడా ప్రీ వెడ్డింగ్ షూట్ పేరుతో అసహ్యం కల్గించే రీతిలో కాకుండా హద్దుల్లో ఉంటే మేలని ఆధ్యాత్మికవేత్తలు సూచిస్తున్నారు.
ప్రీ వెడ్డింగ్ షూట్ అనేది అశుభం : ఆధ్యాత్మికవేత్తలు
ప్రీ వెడ్డింగ్ షూట్ తరువాత అనుకోని పరిస్థితిలో వివాహం ఆగిపోతే అప్పుడు అమ్మాయి పరిస్థితి ఏమిటనే ప్రశ్నలు కూడా వస్తున్నాయి. ఈలోగా ప్రీవెడ్డింగ్ దృశ్యాలు సోషల్ మీడియాలోకి వస్తే ఆ తరువాత అమ్మాయి పెళ్లి ఇబ్బంది అవుతుందనే వాదన ఉంది. ప్రీ వెడ్డింగ్ షూట్‌ల కోసం చేస్తున్న ఆడంబర ఖర్చులన్నీ వృథా అనే అభిప్రాయాలు వినిపిస్తున్నాయి. వీటి కోసం ఆర్థిక సాయం చేసేందుకు ఫైనాన్స్‌ కంపెనీలు పుట్టుకొచ్చి అదో పరిశ్రమగా మారుతోంది. వీడియో ఫోటోలకు 10 నుంచి 15 లక్షల రూపాయల వరకు వదిలించు కుంటున్నారని ఊటీ వరకు వెళ్లి ఫోటోషూట్‌లు తీయించుకుంటూ తల్లి తండ్రిని భారీగా లూటీ చేస్తున్నారని సున్నితంగా మందలిస్తున్నారు. అంత ఖర్చు చేసి వివాహాలు చేస్తున్నందునే నవ దంపతుల మధ్య అహం పెరిగి రెండు, మూడేళ్లకు విడిపోతున్న ఉదంతాలున్నాయని నిపుణులు అంటున్నారు. పెళ్లి కాకుండా ప్రీ వెడ్డింగ్ షూట్ అనేది అశుభం అని ఆధ్యాత్మికవేత్తలు అంటున్నారు.
